牙肉腫痛、流牙血？可能係牙齦炎前兆，4招改善口腔健康

牙肉腫痛、牙齦發炎、刷牙流牙血係好多成年人常見嘅煩惱。唔少人以為係「熱氣」或夜訓惹禍，但其實好可能係牙周病嘅早期警號。如果冇及早處理，仲有機會惡化成嚴重牙周炎，甚至導致牙齒鬆脫。

常見迷思：熱氣？刷太大力？

香港人習慣將牙肉腫痛歸咎於熱氣，飲涼茶就當補救。但其實大多數情況都係因為牙菌膜積聚，導致牙齦發炎。睡眠不足、抵抗力差亦可能令情況加劇。

另一個誤解係「刷牙刷到流牙血，就要輕手啲或者避開出血位」，其實咁樣反而令牙菌膜積聚更嚴重。正確做法係溫柔但徹底清潔出血位置。

牙肉腫痛原因

牙肉腫痛最常見原因係口腔清潔唔足，令牙菌膜（Plaque）堆積喺牙齒同牙肉交界，引致牙齦炎。以下係常見高風險因素：

• 吸煙／咀嚼煙草

• 糖尿病

• 某啲藥物（避孕藥、類固醇、化療藥等）

• 牙齒唔整齊、矯齒器唔合適

• 賀爾蒙轉變（例如懷孕）

• 遺傳因素

• 免疫系統較弱（例如愛滋病患者）

牙肉腫痛症狀

早期牙齦炎症狀未必明顯，但若果出現以下情況，就要小心：

• 刷牙時流牙血

• 牙肉紅腫、痛楚

• 口臭

• 牙齒敏感／咬嘢痛

• 牙肉退縮

• 牙齒鬆動

• 有膿腫或牙槽骨萎縮現象

一旦發現以上症狀，建議盡快約見牙醫做檢查。

4大方法預防同改善牙肉腫痛

1. 改善刷牙習慣 - 每日早晚刷牙，配合牙線或牙縫刷，清除牙菌膜。 - 選用含氟牙膏或護齦配方牙膏，加強抗菌。
2. 期洗牙及檢查 - 最少每半年洗牙一次，有助早期發現牙周病。 - 如情況嚴重，牙醫可能建議進行牙根刮治或牙周手術。
3. 戒煙控糖 - 吸煙會降低牙肉對抗感染嘅能力。 - 糖尿病患者更加要控制血糖，以減低牙周病風險。
4. 舒緩輕微牙肉痛 - 可用暖鹽水漱口 - 換用軟毛牙刷 - 必要時服用止痛藥（如撲熱息痛） - 使用含過氧化氫嘅漱口水，有助舒緩不適

咩時候要搵牙醫？

如果牙肉腫痛持續超過幾日、反覆發作，或者懷疑有潰瘍、痱滋，千祈唔好拖延，應儘快求診，避免情況惡化成中重度牙周病，甚至牙齒鬆脫。