生痱滋原因、症狀與舒緩方法｜口腔潰瘍點處理先啱？

生痱滋係一種常見口腔問題，通常表現為口腔黏膜嘅細小潰瘍，會引起痛楚、唔適或影響講嘢同進食。雖然多數痱滋會喺7至14日內自行痊癒，但重複發作或潰瘍難以癒合時，就可能係潛在疾病嘅警號。

生痱滋原因係乜？

痱滋（又叫飛滋、口瘡）主要係因為口腔黏膜受損後引發炎症反應，再受到細菌感染所致。雖然「熱氣」食物如薯片、炸物等被認為會誘發痱滋，但實際上並唔係唯一成因，以下係常見原因：

• 咬損、刷牙過猛等造成微細創傷
• 睡眠不足、精神壓力大
• 缺乏維他命B、C、鐵質或鋅
• 女性荷爾蒙變化，例如經期、懷孕
• 使用吸入式類固醇藥物但無漱口
• 遺傳體質，家族中有痱滋病史
• 腸胃疾病、免疫系統問題如克隆氏症

痱滋嘅典型症狀

痱滋通常呈白色或淡黃色潰瘍，邊緣紅腫，會喺口腔內側、舌側、舌底或嘴唇內出現。大小一般係2-5毫米，數量可單一或多顆出現，最常見症狀包括：

• 灼熱痛楚
• 吞口水或進食時更痛
• 說話唔順或含糊不清
• 輕微發燒（嚴重者）

常見迷思與舒緩方法

• 用鹽水漱口？ 適量淡鹽水可殺菌，但唔建議直接搽鹽落潰瘍表面，會刺激患處。

• 維他命C有用？ 若痱滋與營養缺乏有關，補充維他命C或B群可能有幫助，但唔係所有人都適用。

• 西瓜霜有用？ 一些含西瓜霜藥物可有短期抗炎止痛作用，但需注意重金屬超標風險。

家居護理建議

• 保持口腔清潔，避免用力刷牙\
• 飲食清淡，避免辛辣刺激食物
• 睡眠充足、減壓，避免過勞
• 使用含止痛成分漱口水或痱滋膏
• 含冰粒或冰敷，暫時舒緩疼痛

常見治療方法

如痱滋持續超過3星期未癒合，或經常反覆出現，就應考慮求醫。醫生或會建議使用以下藥物：

• 殺菌漱口水（如氯己定）：有助減少細菌滋生
• 類固醇藥膏：有效抑制炎症，但需醫生指導
• 局部麻醉藥膏：如苯佐卡因、利多卡因，能短暫止痛
• 口服藥物：如潰瘍範圍大或反覆發作，或需口服抗炎或類固醇藥物

幾時要睇醫生？

• 潰瘍持續超過3星期未癒合
• 潰瘍範圍大、頻密發作
• 同時出現其他症狀如體重下降、發燒、頸部淋巴腫大
• 懷疑有口腔癌風險者

如你經常生痱滋，建議先從生活習慣、營養攝取、睡眠質素等方面入手改善，配合適當治療同檢查，提升整體口腔健康。