扁桃腺發炎定喉嚨發炎？一文教你分辨症狀、治療同護理方法

喉嚨痛、吞唔到嘢、講唔到嘢，有時未必係普通感冒咁簡單，可能係喉嚨發炎或者扁桃腺發炎。兩者症狀好相似，唔少人搞唔清，結果延誤咗治理時機。其實，只要了解發炎部位同程度，就可以清楚分辨，對症下藥。

點分喉嚨發炎同扁桃腺發炎？

喉嚨發炎通常係咽喉正中紅腫，引起輕微痛楚。相反，扁桃腺發炎會令喉嚨兩側嘅扁桃腺紅腫，嚴重嘅仲會有白點或膿斑，痛楚更加明顯，有時仲會發燒。

如果你發現自己吞嘢好痛、講嘢沙聲，或者頸側有腫脹感，加上高燒，就要考慮可能係扁桃腺發炎。

扁桃腺發炎常見原因

多數係病毒感染，例如腺病毒、流感病毒、EB病毒等；亦有機會係細菌引起，好似鏈球菌就比較常見。當身體免疫力低、生活壓力大，或者夜訓太多，都容易誘發病情。

常見症狀

• 喉嚨痛，吞口水都痛
• 扁桃腺紅腫，甚至有白點
• 發燒、頭痛、聲音沙啞
• 頸側淋巴腫脹或有痛感
• 小朋友可能會流口水、唔肯食嘢、扭計

點診斷？

醫生會睇你嘅喉嚨紅腫程度、摸頸部淋巴，有時會做喉嚨拭子測試，睇下係病毒定細菌引起。如果反覆發作，可能仲會建議照X光或抽血檢查。

居家護理方法

• 多休息，保持水分充足
• 用鹽水或消毒漱口水漱口
• 食含片舒緩喉嚨不適
• 戒煙，避免食刺激性食物
• 保持空氣濕潤，減少乾燥對喉嚨刺激

藥物治療

如果係病毒感染，一般唔使食抗生素，只要做好日常護理就得。但如果係細菌感染，醫生會開抗生素，要按時食晒療程。可以同時服用撲熱息痛幫手退燒止痛。不過要留意，唔可以俾小朋友食阿士匹靈，避免引發雷氏綜合症。

手術情況

如果病情反覆，或者出現扁桃腺膿腫，甚至影響呼吸，可能要做扁桃腺切除手術。好多家長擔心會影響免疫力，其實人體仲有其他淋巴組織可以補位，切除後唔會對健康有重大影響。

點預防？

• 勤洗手，減少病毒傳播
• 均衡飲食、充足睡眠、減壓
• 避免煙酒同刺激食物
• 攝取足夠水分，保持喉嚨滋潤
• 有病徵及早睇醫生，避免病情惡化